زەرەندى اۋدانىندا ەگىس دالا جۇمىسى بارىسىندا  (قازاقستان اۋىلىنا جاقىن ورنالاسقان ءۋالي حان مازارىنان سولتۇستىك-باتىسقا قاراي 10 شاقىرىم جەردە) «ازيااگروحيم» ءجشس-نىڭ ديرەكتورى ب.ب. كوزلوۆ جىرتىلعان جەردە بولجام بويىنشا ەسكى جەرلەۋ ورنى بولىپ كەلەتىن ارابشا جازىلعان گرانيت تۇرىندەگى ەكى تاقتا تاسىن تاپقان، دەپ حابارلايدى ىشكى ساياسات باسقارماسى.

2018 جىلدىڭ 21 مامىرىندا وسى جەرلەۋ ورىندى انىقتاۋ ماقساتىندا اقمولا وبلىسى مادەنيەت باسقارماسىنىڭ «تاريحي-مادەني مۇرانى قورعاۋ جانە پايدالانۋ ورتالىعى» مكم-نىڭ ينسپەكتورلارى، «زەرەندى اۋدانىنىڭ تىلدەردى دامىتۋ جانە مادەنيەت ءبولىمىنىڭ» جانە «اقكول اۋىلدىق وكرۋگى اكىمى اپپاراتى» ءمم-نىڭ ماماندارى مەن جەرگىلىكتى ولكەتانۋشىلاردان قۇرالعان قۇرام اتالمىش وبەكتىگە باردى. ەكى جەرلەۋ ورنىنان باسقا، سول جەردەن تاعى 30 شاقتى بەلگىسىز مۇسىلمان زيراتى انىقتالدى. 

اتالمىش تاريحي ورىندى كاسىبي دەڭگەيدە انىقتاۋ ماقساتىندا قازاقستان رەسپۋبليكاسى ءبىلىم جانە عىلىم مينيسترلىگىنىڭ ر.ب. سۇلەيمەنوۆ اتىنداعى شىعىستانۋ ينستيتۋتىنان (الماتى ق.) ارنايى ماماندى شاقىردى.

ارابشا جازۋدى وقۋ بارىسىندا، جەرلەۋ ورىن XVIII عاسىردىڭ باسى –XIX عاسىردىڭ سوڭىندا جازىلىپ، تاستىڭ بىرەۋى – قاجىنىكى، ال ەكىنشىسى – ابىلاي حاننىڭ قاسىندا جۇرگەن نوكەرىنىكى دەپ بولجاندى.